ដោយ វ៉ាន់ វី និង សំ អេងលាង
ស្លឹកគ្រៃជារុក្ខជាតិដែលគេដាំជាទូទៅនៅតាមផ្ទះដើម្បីប្រើប្រាស់ជារៀងរាល់ថ្ងៃ ជាពិសេសក្នុងការធ្វើគ្រឿងគ្រៅម្ហូបអាហារ។ ដូចយើងដឹងស្រាប់ហើយ ស្លឹកគ្រៃឲ្យក្លិនប្រហើរម៉្យាងដល់ម្ហូប ហើយម៉្យាងទៀតជាគ្រឿងកាត់ចម្អាបផង ដូច្នេះហើយបានជាគេប្រើជាគ្រឿងផ្សំក្នុងសម្ល ឬស្ងោរ ឆា ឬប្រលាក់សាច់អាំងជាដើម។ ពុំតែដូច្នោះ ជួនកាលគេប្រើស្លឹកគ្រៃនៅក្នុងឱសថបុរាណដែរ ហើយដែលគេជឿថា ជួយសម្រួលការមន្ទោបង់ទឹកមូត្រ។
និយាយមកនេះគឺស្លឹកគ្រៃជាដំណាំតាមផ្ទះ។ តែនៅតំបន់ខ្លះគេយកដំណាំស្លឹកគ្រៃធ្វើជាមុខរបបរទៀតផង។ ខ្ញុំសូមលើកឧទាហរណ៍មួយដែលឃើញនៅស្រុកអរិយក្សត្រ ដែលពុំឆ្ងាយប៉ុន្មានពីក្រុងភ្នំពេញ។ គេចាប់ផ្តើមដាំនៅរវាងខែវិច្ឆិកា ឬធ្នូ ហើយប្រមាណ៣ឬ៤ខែក្រោយមក ទើបគេគាស់យកទៅលក់។ តមកទៀតរង់ចាំយ៉ាងយូរ២ខែក្រោយ ក៏អាចគាស់យកទៅលក់បានម្តងទៀត។ តែចាប់ពីខែសីហាទៅទឹកចាប់ផ្តើមលិចដីចម្ការខ្លះ ហេតុនេះដំណាំស្លឹកគ្រៃត្រូវផ្អាកប្រមាណ៣ខែ។
មុននឹងដាំគេកាប់ ឬភ្ជួរដី ហើយបើយកល្អត្រូវចាំរហូតដល់ដាច់ទឹកភ្លៀងសិន ព្រោះបើពុំដូច្នោះទេ ដីស្អិតពេក។ ក្នុងមួយរណ្តៅៗគេអាចដាក់៣ទៅ៤ដើម (រូបលេខ១)។ រណ្តៅមួយទៅរណ្តៅមួយឃ្លាតគ្នាពី៣ទៅ៤តឹក ហើយដើម្បីឲ្យជួររត់ត្រង់ល្អគេប្រើខ្សែធ្វើជាបន្ទាត់ ។ ក្នុងការដាំជារបរនេះ សព្វថ្ងៃគេប្រើជីអុយរ៉េ ២ទៅ៣គ្រាប់ក្នុងមួយគុម្ពដើម្បីឲ្យស្លឹកគ្រៃបែកកូនបានល្អ។ ពេលបែកគុម្ពស្លឹកគ្រៃកើនបាន៣០ឬ៤០ដើមក៏មាន (រូបលេខ២-៣)។ រីឯការមើលថែទាំវិញក៏មានខ្លះដែរ ដូចជាការស្រោចទឹក និងកាត់ស្មៅជាដើម។ ពេលគ្មានភ្លៀងធ្លាក់ គេស្រោចឬបូមទឹកដាក់១០ថ្ងៃម្តង រីឯស្មៅវិញគេកាត់តែម្តង ឬពីរដងប៉ុណ្ណោះ មុនពេលស្លឹកគ្រៃបែកគុម្ពល្អ កុំឲ្យវាទៅគ្របលើស្លឹកគ្រៃនោះ។ លុះស្លឹកគ្រៃដុះខ្ពស់ហើយ ពុំចាំបាច់កាត់ស្មៅទៀតទេ។
៣ខែក្រោយមកគេអាចគាស់យកទៅលក់បាន។ ពេលគាស់នោះ គេតែងបកយកស្រទាប់ក្រៅដែលខូចចេញសិន (រូបលេខ៤-៥)។ គាស់នោះក៏ពុំមែនគាស់អស់ពីគុម្ពឡើយ គឺគេទុក៤ឬ៥ដើមឲ្យបែកកូនតទៅទៀត (រូបលេខ៦-៧)។ ផ្នែកដែលខូចយកចេញនោះ ក៏ពុំឥតប្រយោជន៍ដែរ ដ្បិតគេយកទៅដាក់ធ្វើជាជីនៅគុម្ពដែលទើបនឹងដក ហើយដែលត្រូវបែកកូនតទៅទៀត។ ដូច្នេះឃើញថា នៅលើកទីពីរនេះពុំមានការដាំដូចមុនដំបូងទេ។
នៅអរិយក្សត្រ ឈ្មួញច្រើនទៅទិញស្លឹកគ្រៃដល់កន្លែង ហើយប្រមូលយកទៅលក់នៅភ្នំពេញ (រូបលេខ៨-៩) ជាពិសេសនៅផ្សារដើមគ ដែលជាកន្លែងបោះដុំធំមួយ។ រីឯតម្លៃវិញ បើថោកបំផុតគឺ២០០រៀលក្នុងមួយគីឡូ បើនៅពេលដែលតម្លៃឡើងខ្ពល់បំផុត គឺ១៥០០រៀលក្នុងមួយគីឡូ។ តាមសង្កេតមើល ទោះជាដាំស្លឹកគ្រៃក្នុងទ្រង់ទ្រាយជាចម្ការដូច្នេះក្តី ក៏អាចមានដំណាំផ្សេងទៀតដែលមកលាយឡំខ្លះដែរ ដ្បិតជាបន្លែបង្កា ដែលគ្រួសារនីមួយៗត្រូវការជារៀងរាល់ថ្ងៃ (រូបលេខ១០-១២)។
សូមបញ្ជាក់ថា ជាច្រើនឆ្នាំមកហើយដែលគុណសម្បត្តិរបៀបនេះល្បីល្បាញ ទៅដល់ទ្វីបនានាផ្សេងទៀត រហូតដល់គេធ្វើស្លឹកគ្រៃដាក់កញ្ចប់សម្រាប់ដាំទឹកហូប ជំនួសតែជាដើម។